"Real Madrid" "Barselona"nı darmadağın edərək finala yüksəldi
İspaniya kubokunda 2-ci finalçının adına aydınlıq gəlib.
“Santyaqo Bernabeu” arenasında keçirilən 1-ci matçda “Real”a 1-0 hesabı ilə qalib gələn “Barselona” bu dəfə rəqibini “Kamp Nou”da qəbul edib.
İlk dəqiqələrdən gərginliyi ilə diqqət çəkən qarşılaşmada hesab fasilə ərəfəsində açılıb. Vinisius “kral klubu”nu irəli çıxarıb. 50-ci dəqiqədə fərq 2-yə yüksəlib. Kərim Benzema kataloniyalıları görüşə mərkəzdən başlamağa məcbur edib.
Çox keçmədən fransalı hücumçu özünün 2-ci, komandasının 3-cü qolunu vurub. Bundan sonra “blauqrana”nın baş məşqçisi Xavi ardıcıl əvəzetmələr etsə də, vəziyyəti dəyişmək mümkün olmayıb. Əvəzində “los blankos” 80-ci dəqiqədə 4-cü dəfə meydan sahiblərini məyus edib. Benzema het-trikini rəsmiləşdirib.
Qalan vaxtda mübarizə daha da sərtləşib. Nəticədə hər iki komandadan bir neçə futbolçuya sarı vərəqə göstərilib. Lakin üstünlüyünü qorumağı bacaran “Real” 4-0 hesabı ilə qalib gələrək 9 ildən sonra İspaniya kubokunun finalına yüksəlib.