Qaribaşvilidən sülh sazişi ilə bağlı açıqlama

“Gürcüstan həmişə regionda uzunmüddətli sülh və sabitliyin tərəfdarı olub və bu məsələyə öz töhfəsini verməyə hazırdır”.

Bunu Gürcüstanın Baş naziri İrakli Qaribaşvili erməni həmkarı Nikol Paşinyanla birgə mətbuat konfransında deyib.

“Biz hər zaman uzunmüddətli sülhün bərqərar olmasına töhfə verməyə hazırıq və bunun region ölkələri üçün faydalı olduğuna inanırıq. İrəvanla Bakı arasındakı dialoqu böyük nikbinliklə izləyirik. Ümid edirik ki, tərəflər tezliklə sülh sazişini rəsmiləşdirəcəklər”, – deyə İ.Qaribaşvili bildirib.

Nikol Paşinyan isə qeyd edib ki, Ermənistanla Azərbaycan arasında sülh müqaviləsinin imzalanması regionda sülhün bərqərar olmasına səbəb olacaq.

“Yalnız biz ümumi olaraq qəbul edilmiş prinsiplərə əsaslanan sülh sazişini Azərbaycanla razılaşdırıb imzalayandan sonra regionda sülh əldə olunacaq”, – deyə N.Paşinyan bildirib.

O əlavə edib ki, saziş üzərində iş hələ də davam edir.