Bakıda əri tərəfindən güllələnən qadının son vəziyyəti | TƏBİB-dən açıqlama

İyulun 16-sı Yasamal rayonu ərazisində həyat yoldaşı tərəfindən güllələnən qadının vəziyyəti açıqlanıb.

“Baku TV”nin sorğusuna cavab olaraq TƏBİB-dən bildirilib ki, iyulun 16-da saat 13:30 radələrində Respublika Təcili və Təxirəsalınmaz Tibbi Yardım Mərkəzinə Yasamal rayonu ərazisindən təcili çağırış daxil olub. Çağırış ünvanına təcili tibbi yardım briqadası cəlb edilib.

1987-ci il təvəllüdlü şəxsə ilkin tibbi xidmət göstərilib və qarının ön divarının deşilmiş yarası diaqnozu ilə Kliniki Tibbi Mərkəzə təxliyə olunub. Pasiyent əməliyyat edilib və Reanimasiya şöbəsinə yerləşdirilib. Hazırda vəziyyəti orta-ağır qiymətləndirilir.

Xatırladaq ki, güllələnmə hadisəsi iyulun 16-da saat 13 radələrində paytaxtın Yasamal rayonu ərazisində baş verib. 1987-ci il təvəllüdlü Fərqanə Kərimova həyat yoldaşı, 1986-cı il təvəllüdlü Vasif Kərimov tərəfindən güllələnib.

Faktla bağlı Yasamal Rayon Prokurorluğunda Cinayət Məcəlləsinin 29, 120.1-ci maddəsi ilə cinayət işi başlanılıb. Vasif Kərimov iş üzrə şübhəli şəxs qismində tutulub. Cinayət işi üzrə ibtidai istintaq davam etdirilir.