Elektron Təhlükəsizlik Xidməti vətəndaşlara çağırış etdi

Rəqəmsal İnkişaf və Nəqliyyat Nazirliyinin nəzdində fəaliyyət göstərən Elektron Təhlükəsizlik Xidmətinin müşahidələrinə əsasən, son günlər kiberdələduzlar "Azərpoçt" MMC-nin adı və loqosundan sui-istifadə edərək vətəndaşlara qarşı məqsədli fırıldaqçılıq kampaniyası həyata keçirirlər.

Bu barədə ETX məlumat yayıb.

Bildirilib ki, fırıldaqçılar SMS, zəng və ya saxta e-poçtlar vasitəsilə vətəndaşlara müəyyən məbləğdə vəsaitin ödənilməsi barədə yalan məlumatlar təqdim edirlər. Bu məqsədlə onları şübhəli və saxta keçidlərə yönləndirirlər. Keçidlərdə kart məlumatları tələb olunur və nəticədə vətəndaşların hesabları nəzarətə götürülür.

Qeyd edilib ki, bu tip mesajlar adətən xarici nömrələrdən göndərilir. Saxta mesajların tərkibindəki məzmun əksər hallarda düzgün tərtib edilmir, sözlərin bir-biri ilə məntiqi əlaqəsi olmur.

Vətəndaşlar onlara mesajda təqdim olunan keçidin doğruluğunu da mütləq yoxlamalıdırlar.

ETX və "Azərpoçt" MMC vətəndaşları tanımadıqları mənbədən göndərilən mesajların tərkibindəki keçidlərə daxil olmamağa, bank kartı və digər fərdi məlumatlarını şübhəli keçidlər vasitəsilə qarşı tərəfə ötürməməyə çağırır. Eyni zamanda göndərilmiş bildirişlərin doğruluğunu rəsmi mənbələrdən ‒ "Azərpoçt"un "169" Çağrı mərkəzi və ETX-nin qaynar xətti ‒ "1654", eləcə də hər iki qurumun rəsmi sosial media hesablarına müraciət edərək bildirməyi tövsiyə edir.