Yasamalda sakinləri bezdirən durum | "Nə taksi sifariş edə bilirik, nə də..."

Yasamal rayonunda sakinlər çıxılmaz vəziyyətlə üz-üzə qalıblar. "Baku TV"-nin cəmiyyət bölməsinin məlumatına görə, Şərifzadə küçəsi 148-156 ünvanında yaşayan vətəndaşlar binanın həyətinin kənar şəxslər və obyekt sahibləri tərəfindən zəbt olunmasından şikayətçidirlər. Sakinlərin sözlərinə görə, parklanma xaosu o həddə çatıb ki, həyətə nə təcili yardım maşını girə bilir, nə də sakinlər taksi sifariş edə bilirlər. Hətta uşaq oyun meydançası belə avtomobillərin dayanacağına çevrilib.

Məsələnin əsas səbəbi kimi küçələrdə parklanmanın pullu olması göstərilir. Ödənişdən yayınmaq istəyən sürücülər avtomobillərini binaların dar həyətlərinə sürürlər. "Baku TV"-nin videomaterialında sakinlərin üzləşdiyi çətinliklər, mütəmadi olaraq maşınların vurulması və məhəllə daxilində yaranan səs-küy problemi ətraflı işıqlandırılıb. Yasamal Rayon İcra Hakimiyyəti və aidiyyatı qurumların bu xaosa necə reaksiya verəcəyi isə hələ də sual altındadır. Paytaxtın mərkəzi küçələrindən birində yaşanan bu sosial problemin təfərrüatları bizim xüsusi süjetdə.