Baydenlə Stoltenberq arasında önəmli müzakirə | Görüşdə nələr danışıldı?

ABŞ Prezidenti Cozef Bayden Ağ Evdə NATO-nun Baş katibi Yens Stoltenberqlə görüşüb.

Ağ Evin məlumatına görə, tərəflər Rusiya-Ukrayna müharibəsi və Hind-Sakit okean regionundakı vəziyyəti müzakirə ediblər.

“Gələn ay biz tarixin ən uğurlu ittifaqının 75-ci ildönümünü qeyd edəcəyik, həm də gələcək üçün vacib qərarlar qəbul edəcəyik. Mən ümid edirəm ki, gələn ay biz burada görüşəndə təhlükəsizlik və təlimlərin keçirilməsi sahəsində NATO-nun aparıcı rol oynaması və müttəfiqlərin Ukraynaya maliyyə və hərbi dəstəyi artırması barədə razılığa gələcəyik. Mən hesab edirəm ki, bizim Ukraynaya dəstəyimiz nə qədər güclü olsa, vəziyyət o qədər tez nəticə verəcək”, – NATO-nun Baş katibi deyib.

Baş katib Yens Stoltenberq onu da bildirib ki, bu gün NATO-nun 20-dən çox ölkəsi müdafiəyə 2%-dən çox pul xərcləyir ki, bunun da böyük hissəsi ABŞ-yə gedir.

“Son iki ildə bu vəsaitin üçdəikisi ABŞ-dəki hərbi sifarişlərə yönəldilib, onların həcmi təxminən 140 milyard dollar təşkil edib”, – deyə Y.Stoltenberq qeyd edib.