Baymuradova İrəvanda qətlə yetirildi

Çeçenistandan Ermənistana qaçan 23 yaşlı qadın – Ayşət Baymuradovanın İrəvanın mərkəzindəki mənzildə öldürüldüyü açıqlanıb.

Bu barədə “Meduza” məlumat yayıb.

Rusiya saytı bildirib ki, Ayşət qohumlarının təzyiqlərindən qaçmaq üçün Ermənistana köçüb. İrəvanda evlərdə xadimə kimi işləyib.

Hüquq müdafiəçilərinin fikrincə, Şimali Qafqaz respublikalarından bir çox qadın eyni səbəbdən başqa ölkələrə üz tutublar.

Qeyd olunub ki, A.Baymuradova “Instagram”da həm rus, həm də çeçen dilində təhdidlər alıb. Təhdid mesajlarında ona əvvəllər öldürülmüş qadınların taleyi xatırladılıb və Çeçenistanda “ənənələri pozmaqda” ittiham edilib.

Hüquq müdafiəçisi Lidiya Mixalçenko deyib ki, A.Baymuradova böyük ehtimalla boğularaq öldürülüb və bu qətl Şimali Qafqazdan qaçmağa çalışan qadınlara xəbərdarlıq olaraq nümayişkaranə xarakter daşıyır.

Ermənistan mediasının məlumatına görə, A.Baymuradovanın yoxa çıxması barədə ilk dəfə oktyabrın 17-də Ermənistanda yaşayan rusiyalı fəal Danil Çebikin məlumat verib.

“A.Baymuradova oktyabrın 15-də “Instagram”da tanış olduğu dostu ilə görüşə gedib və bir daha geri qayıtmayıb. Sonradan məlum olub ki, bu dostun izləyiciləri arasında Çeçenistan lideri Ramzan Kadırovun yaxın çevrəsindən olan adamlar da var”, – deyə D.Çebikin sosial mediada yazıb.