Netanyahuya ittiham | Hansı ölkələr Fələstinin müstəqilliyini tanıdı?

3 dövlət Fələstinin müstəqilliyini tanıyıb. Norveçin ardınca İspaniya və İrlandiya da Fələstin dövlətinin tanınması barəsində razılığa gəlib.

Adıçəkilən ölkələrin baş nazirləri birgə çıxış edərək sözügedən məsələ ilə bağlı həmrəy olduqlarını açıqlayıblar. İrlandiyanın Baş naziri Saymon Harris mayın 22-də İrlandiya, Norveç və İspaniyanın Fələstini dövlət kimi tanıdığını bildirib.

“Biz istənilən addımın atılmasına razıyıq və mən əminəm ki, qarşıdan gələn həftələrdə bu mühüm qərarın qəbul edilməsində başqa ölkələr də bizimlə həmrəy olacaqlar. Bu gün İrlandiya və Fələstin üçün tarixi və mühüm bir gündür. 1919-cu il yanvarın 21-də İrlandiya dünyadan müstəqil dövlət olmaq hüququmuzun tanınması üçün çağırış etdi. Dünya xalqlarına mesajımız müstəqilliyimizin beynəlxalq səviyyədə tanınmasından ibarət idi. Biz həmçinin fərqli milli kimliyimizin, tarixi mübarizəmizin vacibliyini vurğulayırdıq. Bu gün biz Fələstinin dövlət kimi tanınmasını dəstəkləmək üçün eyni üsuldan istifadə edirik. Biz bunu beynəlxalq hüququn əsas prinsipləri kimi azadlıq və ədalətə inandığımız üçün edirik”, – nazir əlavə edib.

Fələstin dövlətinin tanınması məsələsinə İsraildən reaksiya gecikməyib. Ölkənin xarici işlər naziri İsrael Katz sosial media hesabında bildirib ki, Norveç və İrlandiyadakı səfirlər artıq məsləhətləşmələr üçün geri çağırılıb. Qeyd edilib ki, İsrail onun suverenliyinə xələl gətirən və təhlükəsizliyini təhlükə altına alanlar qarşısında səssiz qalmayacaq.