Arkadi Qukasyan Koçaryanla bağlı nələr danışdı? | Məhkəmədə etiraf edildi ki...

Hərbi cinayətlərdə təqsirləndirilən erməniəsilli şəxslərin məhkəmə prosesi davam edir.

Bakı Hərbi Məhkəməsində keçirilən növbəti prosesdə Arkadi Qukasyan dövlət ittihamçılarının suallarını cavablandırıb.

“Azərtac” xəbər verir ki, o, prokurorun “böyük Ermənistan” ideologiyası ilə razısınızmı?” sualına cavabında bu ideyanı nağıl adlandırıb:

“Böyük Ermənistanla” bağlı... Çoxdandır nağıllara inanmıram. “Böyük Ermənistan” ideyası nağıldır. Mən real həyatda yaşayıram, heç vaxt buna real yanaşmamışam”.

Arkadi Qukasyan həmçinin dövlət ittihamçılarının suallarını cavablandırarkən Ermənistan Respublikasının keçmiş prezidenti Robert Köçəryanla bağlı da danışıb. O, 1988-ci ildə Qarabağda keçirilən mitinqlərdə əsas çıxışçının Arkadi Manveloviç Manuçarov olduğunu bildirərək deyib:

“Robert Köçəryanın çıxışları yadımda deyil. Biz rus dilində təhsil aldığımız üçün mənim kimi, onun da ədəbi erməni dili ilə bağlı problemi var idi. Ola bilər ki, o, mitinqin təşkilatçılarından olub, çünki “Krunq” təşkilatının üzvü idi”.

Bununla yanaşı, A.Qukasyan bildirib ki, 1992-ci ildə Qarabağ ərazisində 30 mindən az erməniəsilli sakin yaşayırdı. O deyib ki, sonradan həmin şəxslərin bir qismi Qarabağda qalıb, bir qismi Ermənistana, digər qismi isə Rusiyaya köçüb.