Gürcüstanın paytaxtı Tbilisidə 28 May - Azərbaycanın Müstəqillik Günü qeyd olunub

Tbilisidə 28 May – Azərbaycanın Müstəqillik Günü münasibətilə rəsmi qəbul keçirilib.

Azərbaycanın Gürcüstandakı səfirliyinin təşkilatçılığı ilə keçirilən tədbirdə səfir Faiq Quliyev, Gürcüstan Parlamentinin sədri Şalva Papuaşvili, SOCAR-ın Gürcüstan nümayəndəliyinin rəhbəri Mahir Məmmədov və ictimaiyyət nümayəndələri iştirak ediblər.

Mərasimdə 1918-ci ildə əldə edilən müstəqillik və bugünkü uğurlar, işğaldan azad olunmuş ərazilərdə görülən quruculuq işlərindən söz açılıb.

Gürcüstan parlamentinin sədri Şalva Papuaşvili Azərbaycan Respublikasını və Azərbaycan xalqını Müstəqillik Günü münasibətilə təbrik edib.

“1918-ci ilin bu günləri bizi birləşdirir. Həmin il Azərbaycan və Gürcüstan bu günlərdə müstəqilliklərini elan etdilər. Təəssüf ki, o zaman ölkələrimizin müstəqilliyi uzun çəkmədi. Ancaq illər keçdi və bu gün biz birlikdə müstəqillik günlərimizi qeyd edirik. Ölkələrimiz arasında tarixi dostluq əlaqələri bu gün də davam edir. Mən azərbaycanlı bacı və qardaşlarıma çiçəklənən və inkişaf edən ölkədə yaşamağı arzulayıram. Bu gün Azərbaycanın ərazi bütövlüyünün bərpa olunması, iqtisadi baxımdan ölkənin gücünün daha da artması azərbaycanlıların sevincini xüsusilə artırır”, – Ş.Papuaşvili əlavə edib.

Qeyd edək ki, tədbir musiqili proqramla davam etdirilib.