Rusiya telekanalında Azərbaycanla bağlı fakt saxta təqdim edildi

Rusiyalı jurnalist Vladimir Solovyovun “Rossiya 1” telekanalında yayımlanan proqramında növbəti dəfə şovinizm, separatçılığa yönəlik təxribatçı çıxışlara və tarixi saxtalaşdırmalara yer verilib.

Belə ki, proqramın qonaqlarından biri – Yaxın Şərq və Mərkəzi Asiya ölkələrinin öyrənilməsi üzrə mərkəzin direktoru, milliyətcə erməni Semyon Baqdasarov Azərbaycana qarşı cəfəng fikirlər səsləndirib. O, tarixə ekskurs edərək guya Qarabağın “Gülüstan” müqaviləsi əsasında könüllü olaraq Rusiya imperiyasının tərkibinə daxil olduğu barədə sərsəmləyib.

Daha sonra V.Solovyov da onun sözünü kəsərək Qarabağla bağlı bu yalan fikri bir daha təkrarlayıb. O həmçinin qeyd edib ki, Qarabağ Rusiya üçün yad torpaq deyil.

Qeyd edək ki,“Rossiya 1" telekanalı mütəmadi olaraq ölkəmizə və xalqımıza qarşı belə təxribatçı mövqedə dayanan proqramlar yayımlayır. Rusiyanın rəsmi dövlət kanalının çirkin oyunlarda vasitəyə çevrilməsi isə əlbəttə ki, təəssüf doğurur.