AHİK Novruz münasibətilə uşaqlar üçün tədbirlər keçirdi - Baku TV

Azərbaycan Həmkarlar İttifaqları Konfederasiyası və üzv təşkilatları Novruz bayramı münasibətilə müxtəlif şəhər və rayonlarda uşaqlar üçün silsilə bayram tədbirləri təşkil edirlər.

Şənliklər çərçivəsində azyaşlılar üçün rəngarəng və əyləncəli proqramlar təqdim olunur, müxtəlif oyunlar təşkil edilir, uşaqlara bayram hədiyyələri verilir.

Bayram tədbirləri Şərqi Zəngəzur və Qarabağ bölgəsində yaşayan uşaqları da əhatə edib. Füzuli, Cəbrayıl, Zəngilan, Laçın, Şuşa, Ağdam, Kəlbəcər, Xankəndi və Xocalıda keçirilən şənliklərdə Azərbaycan Həmkarlar İttifaqları Konfederasiyası nümayəndələri uşaqları Novruz bayramı münasibətilə təbrik edib, onların öz doğma torpaqlarında bayramı qeyd etmələrinin xüsusi sevinc və qürur hissi doğurduğunu vurğulayıblar.

Tədbirlərdə həmçinin Azərbaycan Prezidentinin rəhbərliyi ilə uşaqların sağlam, hərtərəfli və Vətənə layiqli vətəndaş kimi yetişməsi üçün yaradılan şəraitdən bəhs olunub. Eyni zamanda Birinci vitse-prezident Mehriban Əliyevanın rəhbərlik etdiyi Heydər Əliyev Fondunun uşaqların rifahına yönəlmiş sosial-humanitar layihələrinin əhəmiyyəti diqqətə çatdırılıb.

Novruz şənliklərində uşaqlar şeirlər səsləndirib, sevinclərini bölüşüblər.

Tədbirlərin sonunda Azərbaycan Həmkarlar İttifaqları Konfederasiyası tərəfindən azyaşlılara bayram sovqatları təqdim olunub.