Alıcı yoxdur, satmaq sərf eləmir | Maşınların qiyməti kəskin ucuzlaşdı

Taksi fəaliyyəti ilə bağlı yeni qaydaların qüvvəyə minməsinə sayılı günlər qalır.

İyulun 1-dən istehsal tarixi 15 ildən artıq olan avtomobillərin bu sahədə fəaliyyəti mümkün olmayacaq.

Bəs yeni qərarın tətbiqi nəqliyyat vasitələrinin qiymətinə necə təsir edəcək?

Avtomobil satışı ilə məşğul olan Eldar Əliyevin sözlərinə görə, yeni tələblərlə əlaqədar taksiyə yararsız maşınların qiymətində ucuzlaşma müşahidə olunur:

“12-13 minə satılan maşının qiyməti indi 7-8 min olub. Taksidən çıxan maşınlara rayon camaatı daha çox üstünlük verir”.

Bununla yanaşı, qiymətin aşağı olmasına görə avtomobilini satmayan taksi sürücüləri də var.

“Mənim maşınım taksi fəaliyyətinə uyğun deyil. Amma saxlayacağam, öz işlərim üçün sürəcəyəm. Çünki satmaq sərf etmir, alıcı yoxdur, qiymət çox aşağıdır. Maşınımın bazar qiyməti 12-13 mindir, amma 7-8 minə yaxın duran yoxdur”, – sürücü deyib.

Qeyd edək ki, iyulun 1-dək müvafiq icazələri alan, buraxılış tarixi 15 ilə qədər olan avtomobillər taksi kimi fəaliyyət göstərə biləcəklər. Bu tarixdən sonra istehsal tarixi 8 ildən çox keçmiş avtomobillərə isə buraxılış kartı verilməyəcək.