“Doğma yurdumda xidmət edəcəyəm” | Xankəndi, Xocalı və Ağdərəyə 142 nəfər köçürüldü

İşğaldan azad edilmiş ərazilərə Böyük Qayıdış prosesi davam edir.

Yanvarın 30-da Xocalı rayonunun Təzəbinə və Xanyurdu kəndlərinə növbəti köç həyata keçirilib.

Bu mərhələdə Təzəbinə kəndinə 8 ailə (41 nəfər), Xanyurdu kəndinə isə 6 ailə (24 nəfər) geri qayıdıb.

Xankəndi şəhərində, Ağdərə və Xocalı rayonlarında Prezidentin xüsusi nümayəndəsinin müavini Səbuhi Qəhrəmanov sakinlərə yeni evlərin açarlarını təqdim edib.

O bildirib ki, azad edilən ərazilərdə müasir infrastruktur qurulur, yaşayış evləri, sosial obyektlər inşa edilir və sakinlərin rahat, təhlükəsiz şəkildə məskunlaşması üçün hərtərəfli şərait yaradılır.

Qeyd edək ki, yanvarın 30-da Xankəndi şəhərinin Kərkicahan qəsəbəsinə və Ağdərə rayonunun Həsənriz kəndinə də köç olub. Bu mərhələdə Kərkicahan qəsəbəsinə 25, Həsənriz kəndinə isə 52 nəfər qayıdıb.