DTX ötən il neçə cinayət işinə baxıb? | Əli Nağıyev detalları açıqladı

2023-cü il ərzində 27 dəfə dövlətə xəyanət cəhdi olub.

Bu barədə Dövlət Təhlükəsizliyi Xidmətinin rəisi, general-polkovnik Əli Nağıyevin “Respublika” qəzetində dərc olunan məqaləsində qeyd edilib.

Bildirilib ki, 2023-cü ildə Dövlət Təhlükəsizliyi Xidməti 340 şəxs barəsində 190 cinayət işinin ibtidai istintaqını aparıb. Həmin cinayət işlərindən 27-si dövlətə xəyanət, 12-si casusluq, 7-si dövlət xadiminin və ya ictimai xadimin həyatına sui-qəsd etmə, 35-i terrorçuluq, terrorçuluğa hazırlıq və Azərbaycan hüdudlarından kənarda silahlı münaqişələrdə iştirak etməklə bağlı olub.

Bununla yanaşı, icraatda olan cinayət işləri üzrə ümumilikdə 175 milyon manatdan artıq pul vəsaitinin ödənilməsi və əmlak üzərinə həbs qoyulması təmin edilib.

Əli Nağıyevin məqaləsində həmçinin o da qeyd olunub ki, 1992-ci ilin yanvarında Daşaltı əməliyyatında itkin düşən daha 73 nəfərin adı yaxın günlərdə ictimaiyyətə açıqlanacaq.

O cümlədən Birinci Qarabağ müharibəsində itkin düşən 3890 vətəndaşın taleyinə aydınlıq gətirilməsi, işğaldan azad olunan ərazilərdə kütləvi məzarlıqların müəyyən olunması, meyit qalıqlarının ekshumasiyası və eyniləşdirilməsi istiqamətində hazırda intensiv iş aparılır. Görülən tədbirlər nəticəsində 107 itkin düşən şəxsin eyniləşdirilməsi təmin edilib.