Ən çox reklam izləyirik ? | TV-lərdə efir bölgüsü
Azərbaycanda ümumölkə yerüstü televiziya yayımında olan kanallarda 2023-cü ilin noyabr ayında informasiya və analitik proqramların xüsusi çəkisi ümumi payın 25 faizini təşkil edib.
Bu barədə Audiovizual Şuranın təqdim etdiyi televiziya proqramlarının janrlar üzrə bölgüsü və hər bir kanal üzrə ayrı-ayrılıqda statistikasında qeyd olunub.
Statistikaya əsasən, reklam və sponsor proqramları 16,6%, idman 15,3 %, musiqi və əyləncə janrında olan proqramlar 12,1%, mədəni-maarif janrında olan proqramlar 9,7%, sosialyönümlü proqramlar 5,7%, bədii filmlər 3,9%, anons və elanlar 3,4%, seriallar (xarici istisna olmaqla) 2%, sosial reklamlar 0,8%, cizgi filmləri və bədii filmlər (yerli istehsal) 0,6%, teleticarət xarakterli proqramlar 0,5%, uşaq proqramları 0,4% təşkil edib.
Ayrı-ayrı telekanalların statistikasına əsasən, Azərbaycan Dövlət Televiziyasında efirin əsas hissəsini informasiya və analitik proqramlar təşkil edib. Onların özəl çəkisi 43,8% təşkil edib. Dövlət televiziyasında reklam və sponsor təqdimatları 18,7%, mədəni-maarif janrında olan proqramlar isə 7,2%-dir.
“İctimai Televiziya”da da ümumi efirin əsas hissəsini 25,5 faizlə informasiya və analitik proqramları təşkil edib. Mədəni-maarif janrında olan proqramlar 21,9%, bədii filmlər (xarici istehsal) isə 8,3%-dir.
ATV-də musiqi və əyləncə janrında olan proqramlar üstünlük təşkil edib. Onlara ümumi efirin 18,5%-i ayrılıb. Bu kanalda reklam və sponsor təqdimatları 17,7%, sosialyönümlü proqramlar 15,5%-dir.
“Space TV”də reklam və sosial təqdimatlar efir vaxtının 20%-ni təşkil edir, musiqi və əyləncə proqramları 19,4%, sosialyönümlü proqramlar 18,5%-dir.
“Xəzər TV”də isə ən çox pay reklam və sponsor təqdimatlarıdır. Onların xüsusi çəkisi 20,1 faiz təşkil edib. Musiqi və əyləncə janrında olan proqramların payı 19,4%, informasiya və analitik proqramlar 15,9%, mədəni-maarif janrında olan proqramlar isə 10,5%-dir.
ARB televiziyasında 24%-lə musiqi və əyləncə janrında olan proqramlar daha çox paya sahibdir. Sosialyönümlü proqramlar 16,4%, informasiya və analitik proqramlar isə 12,9%-dir.
“Real TV” və “ARB24” telekanalları informasiya istehsalı üzrə ixtisaslaşdıqlarından efir vaxtının əsas hissəsi informasiya və analitik proqramlara ayrılıb, müvafiq olaraq 61,6% və 79,8%-dir.
![icon](/images/loading.png)