FHN Xaçmazdakı təlimlə bağlı vacib məlumat yaydı

Xaçmazda taktiki-xüsusi təlim keçirilib. Təlimə Fövqəladə Hallar Nazirliyinin (FHN) Beynəlxalq Axtarış-Xilasetmə Dəstəsinin üzvləri, Şimal Regional Mərkəzinin və Nazirliyin qurumlarının həmin regionda fəaliyyət göstərən struktur bölmələri, həmçinin “Tibbi Ərazi Bölmələrini İdarəetmə Birliyi”nin qüvvələri cəlb olunub.

Təlimin praktiki hissəsində şərti olaraq şimal regionunda baş vermiş zəlzələnin nəticələri aradan qaldırılıb. Bu məqsədlə qüvvələr hazırlıq vəziyyətinə gətirilib, təyin olunan əraziyə yürüş həyata keçirilib, “Əməliyyatlar bazası” qurulub, bölmələrin yerləşməsi üzrə tədbirlər reallaşdırılıb.

Pilotsuz uçuş aparatının, akustik axtarış cihazının, termal kamera və digər xüsusi vasitələrin tətbiqi ilə ərazidə yaranmış vəziyyət qiymətləndirilib, əsas fəaliyyət istiqamətləri müəyyən olunub.

Eyni zamanda xilasedicilərin təhlükəsizliyinin təmin olunması istiqamətində mühüm addımlar atılıb, o cümlədən dağılmaq təhlükəsi olan tikililərin “dayaqvermə” üsulu ilə möhkəmləndirilməsindən sonra müasir avadanlıqlar tətbiq olunmaqla dağıntılar altından və hündürlükdən xilasetmə tədbirləri həyata keçirilib. Təlim 4 gün davam edəcək.