İş yerlərində psixososial risklər müzakirə olundu

Dövlət Əmək Müfəttişliyi Xidməti 28 Aprel – Ümumdünya Əməyin Mühafizəsi Günü ilə əlaqədar “İş yerlərində psixososial risklərin idarə olunması: müasir yanaşmalar və həll yolları” mövzusunda konfrans təşkil edib.

Tədbirdə son illərdə əməyin mühafizəsi sahəsinə nəzarətin rəqəmsal alətlərin geniş tətbiqi ilə çevik və təkmil şəkildə qurulması, bu sahədə maarifləndirmə tədbirlərinin və təlim proqramlarının əhatə dairəsinin genişləndirilməsi işlərindən bəhs olunub.

İşğaldan azad edilmiş ərazilərdə də əməyin mühafizəsi ilə bağlı ardıcıl maarifləndirmə tədbirlərinin həyata keçirildiyi, son iki ildə əməyin mühafizəsi ilə bağlı 167 dövlət standartının hazırlanaraq təsdiqləndiyi diqqətə çatdırılıb.

“DOST Müfəttiş” və “Nümunəvi müəssisə” layihələrinin iş yerlərində əməyin təhlükəsizliyinin təminatına da mühüm töhfə verdiyi vurğulanıb.

Daha sonra “DOST Müfəttiş” layihəsində fəal iştirak edən, eləcə də müəssisələrində əməyin mühafizəsi işini nümunəvi şəkildə təşkil edən işəgötürənlər, həmçinin ESG və sosial dayanıqlılıq prinsiplərinin effektiv tətbiqinə töhfə verən iştirakçılar nominasiyaları üzrə təltif olunublar.

Konfrans “Psixososial risklərin iş mühitinə təsiri” mövzusunda panel müzakirə ilə davam edib.