Kimlərə məbləği artmış sosial yardım veriləcək?

2024-cü ildə yaşayış minimumu və ehtiyac meyarının həddi artırılacaq.

Qanunvericiliyə ediləcəyi gözlənilən dəyişikliklərlə bu göstəricilər 10 faizə yaxın artırılaraq 270 manata yüksəldiləcək. Hazırda yaşayış minimumu və ehtiyac meyarının həddinin məbləği 246 manatdır.

Deputat Vüqar Bayramov məsələ ilə bağlı bildirib ki, ehtiyac meyarının artması vətəndaşın gəlirlərinin artmasına imkan yaradacaq:

“Daha çox sosial yardım almasına gətirib çıxaracaq. Məsələn, əgər 5 nəfərlik ailənin 800 manat gəliri varsa, indiki halda mövcud ehtiyac meyarı ilə onun ünvanlı sosial yardım proqramı çərçivəsində aldığı yardımın məbləği 430 manatdır. Amma həmin vətəndaşımız 2024-cü ildə sosial yardım üçün müraciət edərsə, onun aldığı məbləğ 550 manat olacaq”.

İqtisadçı Rəşad Həsənov isə hesab edir ki, ehtiyac meyarının həddinin artım göstəricisi böyük deyil və qiymət artımlarının yaratdığı təzyiqi neytrallaşdırmağa hesablanıb.

Ehtiyac meyarının yeni məbləği yalnız 2024-cü ilin yanvarın 1-dən təyin olunacaq sosial yardımlara şamil ediləcək.

Yaşayış minimumuna gəlincə, bu göstərici əhalinin həyat səviyyəsinin qiymətləndirilməsində, proqnozlaşdırılmasında, tənzimlənən qiymət və tariflərin formalaşdırılmasında və digər məqsədlər üçün istifadə olunur.