Müəllim məktəbli qıza qiymət əvəzinə uyğunsuz hərəkət edib? - Anası danışdı

Bir neçə gün əvvəl yayılan xəbərlərdə Xaçmazın Qusarçay tam orta məktəbinin fiziki tərbiyə müəllimi, 60 yaşlı Təbriz Adıgözəlovun səkkizinci sinif şagirdi olan qıza qarşı qeyri-etik davrandığı, bundan sonra məktəbin direktor əvəzinin və sözügedən müəllimin işdən azad olunması əksini tapmışdı.

Məktəblinin anası Nərgiz Zülfüqarova isə açıqlamasında bildirib ki, səslənən fikirlər həqiqəti əks etdirmir:

“Uşaqla bu barədə söhbət etdik, belə bir şeyin baş vermədiyini dedi. Övladım çox əziyyət çəkir, utanır, bayıra çıxa bilmir, məktəbə getmir. Müəllim də çox yaxşı müəllimdir, təqsiri yoxdur. Haqsız yerə cəzasını çəkir. Zərərini mən çəkirəm, uşağımın, mənim adım biabır oldu. Balamı da, məni də bədbəxt etdilər”.

Məsələ ilə bağlı Daxili İşlər Nazirliyinin mətbuat xidmətinin Quba regional qrupundan bildirilib ki, Xaçmaz Rayon Polis Şöbəsində bununla bağlı araşdırma aparılıb və səslənən iddialar öz əksini tapmayıb. Hadisə ilə bağlı saxlanılan yoxdur.