"Media savadlılığı" tədbirində əsas mövzular | Konfrans nə vaxta qədər davam edəcək?

“Media Savadlılığı” Həftəsi çərçivəsində ənənəvi “Media Savadlılığı” konfransı keçirilib.

Medianın İnkişafı Agentliyinin təşkilatçılığı, aidiyyəti dövlət və özəl qurumların, akademik müəssisələrin, media və vətəndaş cəmiyyəti institutlarının tərəfdaşlığı ilə keçirilən tədbirdə müxtəlif qurumları təmsil edən rəsmi şəxslər, xarici ekspertlər, o cümlədən 500 nəfərə yaxın könüllü və gənc iştirak ediblər.

Konfransın açılış mərasimində çıxış edən Medianın İnkişafı Agentliyinin İcraçı direktoru Əhməd İsmayılov media savadlılığının artırılmasının kifayət qədər miqyaslı və cəmiyyətin bütün seqmentlərini əhatə edən davamlı proses olduğunu bildirib.

Qeyd edib ki, dövlət qurumlarının, media və cəmiyyətin ünsiyyətinin sağlam prinsiplər əsasında qurulması və effektiv kommunikasiyasının vacibliyi, medianın məzmun istehsalında peşəkarlığının yüksəldilməsi bu istiqamətdə mühüm əhəmiyyət kəsb edir.

Audiovizual Şuranın sədri İsmət Səttarov media savadlılığının ehtiyac duyulan məlumatı toplamaq, qiymətləndirmək və ondan səmərəli istifadə etmək bacarığı olduğunu diqqətə çatdırıb.

O bildirib ki, informasiyanı anlamaq, tənqidi düşünmək, jurnalistikanın prinsiplərini mənimsəmək, medianın necə fəaliyyət göstərdiyini başa düşmək, yayılan məlumat və hadisələrin heç də həmişə reallığı əks etdirmədiyinin fərqində olmaq media savadlılığının əsasını təşkil edir.

Mərakeş Krallığının Audiovizual Kommunikasiyalar üzrə Ali Qurumunun sədri Lətifə Axarbaş isə müasir dövrdə elektron informasiya cəmiyyətinin sürətlə genişlənməsi və rəqəmsal mühitdə məlumatlara asan çıxışın təmin edilməsi ilə əlaqədar auditoriyanın xəbərin doğru və etibarlı tərəfini müəyyənləşdirməkdə çətinliklərlə üzləşdiyini vurğulayıb. Bu istiqamətdə media savadlılığının artırılmasının əhəmiyyətindən danışıb.