"Yaxşı bir şey deyil" | Çipsiz nömrəli avtomobillər radara düşmür?

Azərbaycanda avtomobillərdə çipli dövlət qeydiyyat nişanlarının ləğv edildiyi bildirilir. Bu barədə xəbərlər sosial şəbəkələrdə yayılıb. Sürücülər də deyirlər ki, mövcud çipli nömrələrin istifadəsi məhdudlaşdırılır.

Bəs çipli və çipsiz dövlət qeydiyyat nişanlarının fərqi nədir?

Nəqliyyat eksperti Eldəniz Cəfərov bu suala aydınlıq gətirib.

“Şayiələr yayılıb ki, çipsiz nömrələr radara düşmür. Amma bu, yanlışdır. Nömrədə çipin olması, sadəcə, yol polisinin işini asanlaşdırır. O bununla həmin nömrənin mövcud avtomobilə mənsub olub-olmadığını dəqiqləşdirə bilir”, – deyə Eldəniz Cəfərov qeyd edib.

Məsələ ilə bağlı Baş Dövlət Yol Polisi İdarəsindən bildirilib ki, yeni hazırlanmış dövlət qeydiyyat nişanlarında çip elementlərinin tətbiqi nəzərdə tutulmur. Çiplər vaxtilə nəqliyyat vasitələrinə dair məlumatların elektron qaydada ötürülməsi və identifikasiyası məqsədilə nəzərdə tutulsa da, mərkəzi informasiya sisteminin yenilənməsi, eləcə də müasir radar, kamera və nömrə tanıma sistemlərinin təkmilləşdirilməsi nəticəsində bu funksionallıq artıq daha səmərəli və müasir texnoloji üsullarla həyata keçirildiyindən çiplərin tətbiqinə zərurət qalmayıb.

O da vurğulanıb ki, bu yenilik yalnız yeni verilən dövlət qeydiyyat nişanlarına aiddir. Yəni hər hansı elanlara görə mövcud nömrə nişanlarının dəyişdirilməsinə ehtiyac yoxdur.