SOCAR-ın Bakı Ali Neft Məktəbi bərpaolunan enerji və süni intellekt üzrə kadr hazırlayacaq - Baku TV

SOCAR-ın Bakı Ali Neft Məktəbində (BANM) tədris proqramları hər il yenilənir.

BANM-in rektoru Elmar Qasımov AZƏRTAC-a açıqlamasında bildirib ki, ötən illər ilk dəfə olaraq data analitika və maliyyə ixtisasları üzrə tədrisə başlanılıb.

Gələcəkdə isə bərpaolunan enerji mühəndisliyi, süni intellektin mühəndisliyə tətbiqi və bu sahələrdə kadr hazırlığı planlaşdırılır.

Rektorun sözlərinə görə, 7 il əvvəl açılan informasiya təhlükəsizliyi ixtisası bu gün ölkədə ən nüfuzlu ixtisaslardan biridir.

“Hazırda Azərbaycanda ən güclü kibertəhlükəsizlik mühəndisləri məhz BANM-də yetişdirilir. Sənaye varsa, biznesin idarə edilməsi də olmalıdır. Bu baxımdan BANM bu gün yalnız neft-qaz mühəndisliyi üzrə deyil, həm də İT ixtisasları üzrə ölkədə ən güclü təhsil müəssisəsidir”, – deyə Elmar Qasımov əlavə edib.