Sosial Tədqiqatlar Mərkəzi antiterror tədbirləri ilə bağlı sorğunun nəticələrini açıqladı

Sosial Tədqiqatlar Mərkəzinin keçirdiyi ictimai rəy sorğusu Azərbaycan cəmiyyətinin antiterror tədbirlərindən sonra sülh müqaviləsinin imzalanacağı barədə nikbin mövqedə olduğunu göstərib.

Mərkəzdən verilən məlumata görə, “Keçirilmiş antiterror tədbirləri Azərbaycan və Ermənistan arasında sülh müqaviləsini sürətləndirəcəkmi?” sualına münasibətdə respondentlərin 72.4 faizi “bəli” cavabını verib.

Sorğuda iştirak edənlərin 21.4 faizi bu barədə əks mövqedən çıxış edib, 6.2 faizi isə fikir bildirməkdə çətinlik çəkib. Orta və yaşlı nəslə aid respondentlər gənc nəsillə müqayisədə bu barədə daha nikbin mövqeyə malikdir.

Sorğular telefonla müsahibə formasında keçirilib və 18 yaşından yuxarı 385 respondent iştirak edib. Sorğuda əhatə edilmiş respondent sayına əsasən, nəticələrin xəta əmsalı 95% əminlik intervalında 5% təşkil edir.