Sosial Tədqiqatlar Mərkəzi sülh sorğusunun nəticələrini açıqladı

Azərbaycanda respondentlərin 78,5%-i Ermənistanla sülh müqaviləsini dəstəkləyir.

Bu, Sosial Tədqiqatlar Mərkəzinin keçirdiyi rəy sorğusunun nəticəsində məlum olub.

“Sülh müqaviləsinin imzalanmasını dəstəkləyirsinizmi?” sualına respondentlərin 20,2%-i "xeyr, dəstəkləmirəm" cavabını verib, 1,3% rəyini bildirməkdə çətinlik çəkib.

“Yaxın gələcəkdə Azərbaycan və Ermənistan arasında sülh müqaviləsinin imzalanacağına və diplomatik əlaqələrin qurulacağına nə dərəcədə inanırsınız?" sualına respondentlərin 37,2%-i tam inandığını, 29,7%-i əsasən inandığını, 9,7%-i əsasən inanmadığını, 21,5%-i heç inanmadığını bildirib. 1,8% cavab verməkdə çətinlik çəkib.

Nəticələrə görə, respondentlər arasında yaş artdıqca sülhə dəstəyini ifadə edənlərin sayında artım qeydə alınıb. Orta təhsillilərin 74,1%-i, ali təhsillilərin 86,9%-i sülh müqaviləsinin imzalanmasına dəstəyini bildirib. Respondentlər arasında kişilərin 42,8%-i, qadınların 31,6%-i yaxın gələcəkdə sülh müqaviləsinin imzalanacağına tam inandığını, onların 27,3%-i və 32,1%-i əsasən inandığını bildirib.

Sorğular 2023-cü ilin 25-28 noyabr tarixlərində, 18 yaşından yuxarı 390 respondent arasında kompüter dəstəkli telefonla müsahibə üsulundan istifadə olunmaqla keçirilib. Seçmə ehtimallı üsulla ölkə üzrə əhalinin paylanmasına proporsional müəyyən edilib və gender balansı qorunub.

Naxçıvan və Şərqi Zəngəzur iqtisadi rayonları istisna olmaqla, 12 iqtisadi rayon seçmə çərçivəsində əhatə olunub. Təsadüfiliyi təmin etmək məqsədilə sözügedən iqtisadi rayonlar üzrə inzibati rayon və şəhərlərə aid telefon nömrələri müvafiq məlumat bazasından xüsusi proqram vasitəsilə sistemli üsulla seçilərək zənglər olunub.