“Sovet dövrünün insanları bugünkü “dindar”lardan daha müsəlman idi” | Turan İbrahimov - AMİN

“Amin” verilişinin yeni buraxılışında jurnalist Turan İbrahimovla modern insan mövzusu müzakirə olunub.

O, cəmiyyətdə özlərini dindar kimi göstərən şəxslərin süni davranışlarına önəm vermədiyini bildirib: “Əsas insanın dedikləri ilə hərəkətlərinin üst-üstə düşməsidir. Biz elə bir dünyada yaşayırıq ki, zahirən dindar görünən şəxslərin qeyri-əxlaqi həyat sürdüyünə, yaxud bəlağətli danışanların, əslində, cahil insanlar kimi qərarlar qəbul etdiyinə şahid oluruq. Mən isə özü ilə barışıq olan insanlara dəyər verirəm”.

T.İbrahimov həmçinin formal inancla real əməllər arasındakı fərqlərdən danışıb.

“Sovet dövründə sadə imkanlarla yaşayan, Allaha inanan, lakin dövrün şərtlərinə uyğunlaşan insanlar var idi. Əməlləri müqayisə etsək, səmimiyyət baxımından onlar daha çox müsəlman idilər. Bu gün zahirən dindar görkəmində olub dəfələrlə həccə gedən, lakin ətrafına faydasından çox ziyanı toxunan və əxlaqı qüsurlu olan şəxslərdənsə, müasir geyimdə olan, amma mənəvi dünyası, inancı və əməlləri düzgün olan insan mənim nəzərimdə daha çox müsəlmandır”, – deyə o bildirib.