TƏBİB-dən Aktaudakı təyyarə qəzasında yaralanan şəxslər barədə açıqlama

“Bakı-Qroznı reysini yerinə yetirən “Azərbaycan Hava Yolları”na məxsus sərnişin təyyarəsinin Aktau yaxınlığında qəzaya uğraması nəticəsində xəsarət alanlardan 4 nəfərin müalicəsi TƏBİB-in tabeliyindəki tibb müəssisələrində davam etdirilir”.

Bu barədə Tibbi Ərazi Bölmələrini İdarəetmə Birliyindən məlumat verilib.

Bildirilib ki, 1 nəfərin müalicəsi “Yeni Klinika”da, 2 nəfərin müalicəsi Tibbi Reabilitasiya Mərkəzində, 1 nəfərin müalicəsi isə şəxsi istəyi ilə Balakən Rayon Mərkəzi Xəstəxanasında aparılır.

“Yeni Klinika”nın Reanimasiya şöbəsinə qəbul olunaraq, üzərində cərrahi əməliyyat icra olunan şəxs hazırda həmin tibb müəssisəsində stasionar müalicə alır, vəziyyəti orta ağır olaraq dəyərləndirilir.

Tibbi Reabilitasiya Mərkəzində müalicə alan şəxslərin hər birinin vəziyyəti qənaətbəxş hesab edilir. Müalicələri tibb müəssisəsinin Terapiya şöbəsində davam etdirilir.

Balakən Rayon Mərkəzi Xəstəxanasının Cərrahiyyə şöbəsində müalicə alan şəxsin vəziyyəti isə orta ağır, stabil olaraq qiymətləndirlir.

Ümumilikdə “Yeni Klinika”ya hospitalizasiya olunan və zəruri tibbi xidmətlərlə təmin olunan 17 yaralıdan 13 nəfəri artıq ambulator müalicə üçün evə yazılıb. Onların sağlamlıq durumları yaşadıqları ərazi üzrə müvafiq sahə həkimləri tərəfindən nəzarətdə saxlanılır”, – deyə məlumatda bildirilib.