“Vallah, o pulla heç nə etmək olmur” - Avtomobilləri niyə utilizasiyaya vermək istəmirlər? - Baku TV

Bu gün yollarda hərəkət edən minlərlə avtomobil var ki, onların istismar müddəti başa çatıb.

Baxımsız vəziyyətdə olan, banı çürümüş, təhlükəsizlik yastığı olmayan, əyləc sistemi sıradan çıxmış bu avtomobillər potensial təhlükə yaradır.

Dövlət bu tip avtomobillər üçün utilizasiya proqramını tətbiq edir. Lakin bəzi vətəndaşlar hələ də istismar müddətini başa vurmuş avtomobilləri utilizasiyaya vermək istəmirlər. Bəs bunun səbəbi nədir?

Sürücülər utilizasiya üçün verilən məbləğin onları qane etmədiklərini bildirirlər: “1200-1500 manata maşın almaq mümkündür?! O pulla nə maşın ala bilərsən, nə də başqa bir şey”.

2024-cü ilin 15 oktyabrından icrasına başlanılan utilizasiya proqramına bu günə qədər 20 mindən çox avtomobil təqdim edilib. “Təmiz Şəhər”in şöbə müdiri Mirzə Laçınov, 2026-cı ilin başlanğıcından etibarən utilizasiya müraciətlərində artımın müşahidə edildiyini qeyd edir. Onun sözlərinə görə, utilizasiya üçün hər gün 100-dən çox müraciət edilir.

Rəqəmlər əvvəlki illərə nisbətən yüksəkdir. Lakin yetərli deyil.

Elməddin Muradlı bunun əsas səbəbini belə izah edir:

“Hazırda utilizasiyaya verilən maşınların əksəriyyəti dağlarda, bağlarda və çəpərlərin dibində qalmış köhnə avtomobil skeletləridir. Qalanları isə dəmir yığan və mal, heyvan dərisi daşıyan sürücülərin idarə etdiyi, ümumi istifadə yollarına buraxılmayan maşınlardır. Bu maşınlar əsasən məhəllələrdə və gizli yerlərdə sürülürdü və onlar utilizasiyaya verilib. Lakin ümumilikdə yollarda hələ də minlərlə istismara yararsız avtomobil qalır. Onları prosesə cəlb etmək və stimullaşdırmaqdan söhbət gedir. Bu isə mənim fikrimcə, yaxın vaxtlarda reallaşması mümkün olmayan bir məsələdir”.