Vasif Talıbov İrana torpaq satıb ?

Dövlət Sərhəd Xidməti Naxçıvanın Şərur rayonunun Ərəbyengicə kəndi istiqamətində İran-Azərbaycan dövlət sərhəd xəttinin qanunsuz dəyişdirilməsi ilə bağlı yayılan məlumatlara münasibət bildirib.

Qeyd olunub ki, iki ölkə arasında dövlət sərhəd xətti və sərhəd rejimi SSRİ və İran arasında 1954-cü ildə imzalanan “Sərhəd və maliyyə məsələləri üzrə Saziş”ə, eləcə də 1957-ci ildə sərhəd xəttinin təyin olunması və yenilənməsinə dair sənədlərə və xəritələrə əsasən müəyyən edilib.

Dövlət Sərhəd Xidmətindən bildirilib ki, Azərbaycanla İran arasında dövlət sərhəd xətti yuxarıda qeyd edilən sənədlərə tam uyğundur və onun keçmə yerlərində hər hansı bir dəyişiklik baş verməyib.

Açıqlamada o da qeyd olunur ki, iki ölkə arasında sərhəd çaylarının nizamlanması və sahillərin mühafizəsi tədbirləri 2014-cü ildə Bakıda imzalanan memoranduma, eləcə də təlimata əsasən həyata keçirilir. Həmin memorandum Azərbaycanın qanunu ilə təsdiq edilib. Araz çayının təbii səbəblərdən dəyişən su axınının onun əsl yatağına qaytarılması məqsədilə 2016-cı ildən başlayaraq hər iki tərəfin aidiyyəti dövlət qurumlarının mütəxəssislərinin çoxsaylı görüşləri keçirilib. Bu görüşlərdə əldə edilən razılaşmalara uyğun olaraq 2020-ci ildə müvafiq məcranizamlama və sahilbərkitmə işlərinə başlanılıb. Hazırda bu işlər davam etdirilir.

Xatırladaq ki, yayılan məlumatlarda sərhəd xəttinin qanunsuz dəyişdirilməsi nəticəsində 21 hektar torpağın İran ərazilərinə daxil edildiyi iddia olunub. O da iddia edilib ki, Naxçıvan Ali Məclisinin sabiq sədri Vasif Talıbov 21 hektarlıq ərazini İrana satıb.