Yayın ortasında elə güclü külək və leysan olacaq ki... | Əhalinin nəzərinə - Baku TV

Bəzi bölgələrdə gözlənilən qeyri-sabit hava şəraiti ilə əlaqədar Fövqəladə Hallar Nazirliyi əhaliyə müraciət edib.

Milli Hidrometeorologiya Xidmətinin məlumatına görə, ayrı-ayrı ərazilərdə intensiv yağış, güclü külək, ildırım, eləcə də dağ çaylarından qısamüddətli sel və daşqın keçməsi gözlənilir.

Fövqəladə Hallar Nazirliyinin İctimaiyyətlə əlaqə idarəsinin əməkdaşı Ehtiram Xəlilov bildirib ki, vətəndaşlar təhlükəli ərazilərdən uzaq durmalı, sel və daşqın təhlükəsi zamanı isə dərhal yaxınlıqdakı yüksəkliyə qalxmalıdırlar:

“İldırım zamanı elektrik cihazlarını şəbəkədən ayırmaq, rabitə vasitələrindən istifadə etməmək, elektrik dirəkləri və hündür ağacların altında dayanmamaq tövsiyə olunur. Avtomobildə olan şəxslər şüşələri qaldıraraq ildırımın bitməsini gözləməlidirlər. Güclü külək zamanı isə yüngül konstruksiyalı tikililərin, elektrik dirəkləri və naqillərin yaxınlığında dayanmaq təhlükəlidir”.

Ehtiram Xəlilov küləkli hava şəraitində dənizə girməyin və kiçikhəcmli gəmilərlə dənizə çıxmağın qəti qadağan olduğunu da xatırladıb.