İranın adası işğal ediləcək? | Quterreşdən sərt çağırış - Baku TV

"Rəqiblərimiz region ölkələrindən birinin dəstəyi ilə İranın adalarından birini işğal etməyə hazırlaşır".

Bunu İran parlamentinin spikeri Məhəmməd Baqer Qalibaf deyib.

"Qarşı tərəfin bütün hərəkətləri silahlı qüvvələrimizin tam nəzarəti altındadır. Əgər onlar icazə verilən hədləri aşarlarsa, bu regional ölkədəki bütün həyati əhəmiyyətli infrastruktur heç bir məhdudiyyət olmadan amansız hücumlara məruz qalacaq", – deyə spiker vurğulayıb.

Bu arada, BMT-nin Baş katibi Antonio Quterreş ABŞ və İsraili müharibəyə dərhal son qoymağa, İranı isə münaqişə tərəfi olmayan qonşu ölkələrə hücumları dayandırmağa çağırıb.

"ABŞ və İsrailə mesajım budur ki, insan əzablarını dərinləşdirən, mülki itkiləri artıran və getdikcə daha dağıdıcı qlobal iqtisadi nəticələrə səbəb olan bu müharibəyə son qoymağın vaxtı çoxdan keçib", – deyə Quterreş vurğulayıb.

BMT-nin Baş katibi həmçinin İsraili Livan ərazisinə, "Hizbullah"ı isə yəhudi dövlətinə hücumlarını dayandırmağa çağırıb. Onun sözlərinə görə, Yaxın Şərqdəki münaqişələrin bütün tərəfləri diplomatiyanı qəbul etməlidir.

"Qəzza modeli Livanda təkrarlanmamalıdır", – deyə o vurğulayıb.