Zelenskidən Putinin müsahibəsinə sərt reaksiya
Ukrayna Prezidenti Volodimir Zelenski ABŞ-nin “Fox News” telekanalına müsahibə verib.
Çıxışı zamanı ölkə başçısı Rusiya Prezidenti Vladimir Putinin ABŞ jurnalistinə verdiyi müsahibəyə öz münasibətini bildirib:
“Bəli, müsahibə ilə bağlı bəzi şeyləri eşitmişəm. V.Putinin dünyaya verdiyi mesajlar barədə ətrafımdakılar məni xəbərdar ediblər. Çünki mənim şəxsən oturub cəfəngiyyata qulaq asmaq üçün 2 saat boş vaxtım yoxdur. Rusiya-Ukrayna münasibətləri, ABŞ ilə əlaqələrimiz barədə suallar və onunla aparılan müsahibəni nəzərdə tuturam. Amma ümumi olaraq müsahibə barəsində məlumatlıyam”.
Volodimir Zelenski həmçinin ona qarşı edilən sui-qəsd cəhdləri barədə də danışıb. Bildirib ki, artıq sözügedən məsələ onun üçün maraqsızdır:
“Mənə qarşı edilən sui-qəsd cəhdləri 5-ci cəhddən sonra maraqsız gəlməyə başladı. Çünki bundan əvvəlki sui-qəsd cəhdləri zamanı Rusiya-Ukrayna müharibəsi yenicə başlamışdı. Hər şey çox təzə idi və onlar bir neçə dəfə məni öldürməyə cəhd etdilər. İndi bilirəm onların kəşfiyyatı nə işlərlə məşğuldur və hansı addımları atmaq fikrindədir. Lakin bütün bunlar, həqiqətən də, artıq mənim üçün çox maraqsızdır”.
Məlumat üçün bildirək ki, telekanalın V.Zelenski ilə çəkilişi cəbhə xəttindən kənarda, köhnə bir anqarda baş tutub. Görüntülərdə müsahibənin keçirildiyi yerin odun parçaları və sınıq şüşələrlə əhatə olunması öz əksini tapıb. Çəkilişin belə bir məkanda aparılması sosial şəbəkələrdə tənqid olunub. Prezidentin müsahibəni sözügedən şəraitdə verməsi birmənalı qarşılanmayıb.