Kütləvi davada 2 nəfər öldü: dəhşətli cinayətin detalları
Bakıda kütləvi dava zamanı 2 nəfərin – Xəyal Rəhimov və İlkin Rzayevin qətlində təqsirləndirilən Rauf Hüseynov, Ceyhun İsayev və Ramin İsayevin cinayət işi üzrə məhkəmə iclası keçirilib.
Hakim Azad Məcidovun sədrliyi ilə keçirilən prossesdə istintaq üçün əhəmiyyət kəsb edən bir neçə şahidin ifadələri dinlənilib.
Cinayət Məcəlləsinin 4 maddəsi ilə ittiham olunan bu şəxslərlə qətlə yetirilən iki nəfərin arasındakı insident Penitensiar xidmətin 17 saylı cəzaçəkmə müəssisəsində başlayıb. Belə ki, eyni həbsxanada cəza çəkən Rauf Hüseynovla mərhum Xəyal Rəhimov arasında insident yaşanıb və bu ədavət onlar həbsdən azad olunandan sonra da davam edib. Hər iki şəxs görüşərək aralarındakı mübahisəyə son qoymaq qərarına gəliblər.
İstintaq materiallarında qeyd olunur ki, Xəyal Rəhimov narazılığa aydınlıq gətirmək məqsədilə dostu Orxan Fətəliyevlə birlikdə 2023-cü il fevralın 11-də gecə saatlarında Raufun kirayə yaşadığı, Ceyhun İsayevə məxsus evin pəncərəsini döyərək hər iki şəxsi çölə səsləyib.
Bundan sonra tərəflər bir-birinə nalayiq ifadələr işlədib. Rauf üzərində gəzdirdiyi bıçaqla Xəyalın sol əlindən vurub, Orxanla Ceyhun isə bir-birini yumruqlayıb. Daha sonra Ceyhun dəmir dəyənəklə Xəyalın başına güclü zərbələr endirib. Rauf isə zərbələrin təsirindən yerə yıxılan Xəyalın bədəninin müxtəlif nahiyələrinə bıçaqla xəsarətlər yetirib. Xəyal aldığı zərbələrdən 1 saylı Klinik Tibbi Mərkəzə yerləşdirilsə də, həyatını xilas etmək mümkün olmayıb.
Rauf İsayev həmçinin kütləvi davaya sonradan müdaxilə edən İlkin Rzayevi bıçaqla qətlə yetirməkdə də şübhəli bilinir. İlkin döş qəfəsindən aldığı xəsarətdən hadisə yerində keçinib. Prosses davam edir.