Kiyev İranı özbaşınalığına görə qınadı

Son vaxtlar Ukraynanın şimal sərhədində, Belarus ərazisində Rusiyanın nüvə silahı yerləşdirmək planı, İranın isə dron tədarükü ciddi beynəlxalq narahatlığa səbəb olur. Həmçinin Belarus lideri Aleksandr Lukaşenkonun fərqli bəyanatları Ukraynaya şimaldan yeni kütləvi hücum riskini artırıb.

Ukraynanın Milli Təhlükəsizlik və Müdafiə Şurasının katibi Oleksiy Danilov Baku TV-nin Şərqi Avropa bürosuna açıqlamasında buna görə beynəlxalq birliyi qınayıb.

“İran 1979-cu ildən sanksiyalar altındadır və bu ölkə belə olan halda pilotsuz təyyarələr istehsal edə bilirsə, bu sual kimə verilməlidir? Biz çox istəyərdik ki, bütün dövlətlər beynəlxalq qaydalara əməl etsinlər. Belarus lideri Aleksandr Lukaşenkoya gəlincə, o, Kremlin girovudur və çox çətin vəziyyətdədir. Düşünmürəm ki, Rusiya A.Lukaşenkodan Ukraynaya hücuma keçməsini tələb etsin. Belarus lideri bunun ölkəsi üçün nə ilə nəticələnəcəyini yaxşı bilir. Vurğulamaq istəyirəm ki, Ukrayna ərazisində ölkəmiz uğrunda vuruşan Belarus vətənpərvərləri az deyil. Hazırda biz Belarus ərazisindən hücum təhlükəsini görmürük. Sabah nələrin baş verəcəyini bilmirik”, – deyə Oleksiy Danilov bildirib.

Qeyd edək ki, son günlər Belarus ərazisindən Ukraynanın şimal vilayətlərinə, o cümlədən paytaxt Kiyevə İran dronları ilə hücumlar intensiv hal alıb.