Putinin Qələbə paradında sərt çıxışı

“Rusiyaya qarşı yenidən müharibə başlayıb, lakin biz təhlükəsizliyimizi təmin edəcək addımları hər zaman atmışıq”.

Bunu Rusiya Prezidenti Vladimir Putin Moskvada, Qırmızı Meydanda keçirilən Qələbə paradında çıxışı zamanı deyib. O qeyd edib ki, Rusiyanın rəqiblərinin məqsədi federasiyanın parçalanmasıdır.

“Bu gün sivilizasiya yenidən həlledici, dönüş nöqtəsindədir. Vətənimizə qarşı növbəti dəfə əsl müharibə başlayıb, bütün bunlara baxmayaraq, biz beynəlxalq terroru dəf etdik. Donbass sakinlərini də qoruyacağıq, təhlükəsizliyimizi təmin edəcəyik. Qərbdə də, Şərqdə də Rusiyaya dost olmayan xalq yoxdur. Rusiya da planetdəki insanların böyük əksəriyyəti kimi gələcəyi dinc, azad və sabit görmək istəyir”, – deyə V.Putin bildirib.

"İstənilən üstünlük ideologiyası cinayətdir", – deyən Vladimir Putin Qərb elitalarını, xalqlara öz iradələrini sırımağa çalışdıqlarına görə tənqid edib. Rusiya - Ukrayna münasibətlərindən bəhs edərkən isə Kiyev hökumətini cinayətkar adlandırıb.

V.Putin vurğulayıb ki, Ukrayna xalqı dövlət çevrilişinin və Qərbin planlarının girovuna çevrilib, Ukraynada hazırkı fəlakətin səbəbi də məhz budur.