Nizami məqbərə kompleksinin direktoru abidənin tarixi haqqında danışdı - Baku TV

18 Aprel – Beynəlxalq Abidələr və Tarixi Yerlər Günüdür. Gəncədə yerləşən abidələr arasında ən mühümü isə Nizami Gəncəvi məqbərə kompleksidir.

Nizami Gəncəvi məqbərə filialının müdiri Gülnarə İsmayılova məqbərənin tarixi haqqında məlumat verib.

O bildirib ki, Nizami Gəncəvi öz dədə-baba yurdu olan Şıx düzündə yaşayıb və el arasında pir kimi tanınan sərdabədə dəfn olunub:

“Tarixçi İsgəndər bəy Münşinin də təsdiq etdiyi kimi, 1606-cı ildə Gəncə şəhərinin indiki ərazisində yenidən formalaşması nəticəsində məqbərə şəhər mərkəzindən kənarda – Qədim Gəncə ərazisində qalır. Müxtəlif üsyanlar zamanı qismən dağılan sərdabənin bərpası üçün 1922-ci ildə xüsusi komissiya yaradılır, 1939-cu ildə isə şairin qəbri açılaraq rəsmi yaradılır və yeni qəbirdaşı hazırlanır.

Şairin 800 illik yubileyi münasibətilə 1941-ci ildə planlaşdırılan məqbərə inşası İkinci Dünya müharibəsi səbəbindən təxirə salınsa da, 1947-ci ildə təbii daşdan ilk məqbərə tikilir. Daha sonra 1981-ci ildə Ulu Öndər Heydər Əliyevin fərmanı ilə məqbərənin tikilməsi və Nizami Gəncəvinin miniatür əsərlərinin çapı qərara alınır, 1991-ci ildə isə UNESCO xətti üzrə şairin 850 illik yubileyinə görə hazırkı məqbərə ucaldılır. Prezident İlham Əliyevin 23 dekabr 2011-ci il tarixli Sərəncamına əsasən, burada müəyyən təmir işləri aparılır. Amma məqbərənin əsaslı təmiri 2012-ci ildə həyata keçirilir”.