Prorektorun qətli ilə bağlı məhkəmə qərarı | Niyə qapalı keçirilməsini istədilər?

Təfəkkür Universitetinin prorektoru Tariyel Əhmədovun qətlində təqsirləndirilən sözügedən universitetin rektoru Müşfiq Atakişiyev, Dəyanət Quliyev və Samir Quliyevin cinayət işi üzrə məhkəmə prosesi keçirilib.

Bakı Ağır Cinayətlər Məhkəməsində hakim Siyavuş Hacıyevin sədrliyi ilə baş tutan iclasda Müşfiq Atakişiyevin vəkili Kamran Kərimov vəsatət qaldırıb.

O bildirib ki, təqsirləndirilən şəxsin ifadəsində ailə sirri, kommersiya sirri təşkil edən məlumatlar ola bilər. Bu səbəbdən də vəkil prosesin qapalı keçirilməsini istəyib.

Müşfiq Atakişiyev və digər təqsirləndirilən şəxslər vəsatəti müdafiə ediblər. Prokuror Cövdət Mehrəliyev isə cinayət işinin materiallarında sirr təşkil edə biləcək hala rast gəlinmədiyini deyərək vəsatətin təmin olunmamasını istəyib.

Hakim də prosesin qapalı keçirilməsi üçün əsasın olmadığını bildirərək vəsatəti təmin etməyib. Məhkəmə baxışı yanvarın 22-nə təyin olunub.