Qurumlar sorğudan boyun qaçırdı | Sakinlərin istirahət meydançasını darmadağın edənlər

Yasamal rayonu sakinləri həyətdə öz hesablarına yaratdıqları istirahət meydançasının dağıdılmasından şikayətçidir.

Vətəndaşlar bildirirlər ki, binanın düz qarşısında idman kompleksinə məxsus havalandırma sistemi quraşdırılır.

“Düz meydançanın ortasında yerləşdirilib. Dərinliyinə fikir verin, bu, təhlükəlidir. Qonşulardan yığılan pulla işıqlandırma sistemi quraşdırmışdıq. İndi görürük ki, hamısını söküblər. Qaranlıq və sakit olduğu üçün narkomanlar gəlirlər, iynələr tapırıq”, – sakinlərdən biri deyib.

Məsələ ilə bağlı müvafiq MMC-nin direktoru bildirib ki, havalandırma sistemi ilə bina arasında 25-30 metr məsafə var.

Şirkətin hüquqşünası Mehman Muradlı isə qeyd edib ki, həmin ərazidə park və istirahət guşəsinin salınması nəzərdə tutulmayıb. Onun sözlərinə görə, Yasamal Rayon İcra Hakimiyyətinin razılığı ilə həmin sahədə abadlıq işləri aparılacaq.