Ukrayna ilə bağlı vəsvəsə ABŞ üçün niyə ağır nəticələndi?

“ABŞ bütün cəbhələrdə təşəbbüsü itirir və postsovet məkanında Vaşinqton uğursuzluğa düçar olmağa başlayıb”.

Bunu Rusiya Xarici Kəşfiyyat Xidmətinin direktoru Sergey Narışkin deyib.

“Amerikanın Ukrayna ilə bağlı vəsvəsəsi Vaşinqtonun qurduğu bütün qlobal maliyyə və hərbi-siyasi sistemə dağıdıcı təsir göstərməyə başlayır. ABŞ Yaxın Şərqdən tutmuş Asiya və Afrikaya qədər bütün cəbhələrdə təşəbbüsü itirir və postsovet məkanında onlar tamamilə iflasa uğradılar.

Baxın, bu yaxınlarda marionet Mixeil Saakaşvilinin qalstuk yediyi Gürcüstanda qərblilər hakim “Gürcü Arzusu” Partiyasının seçkilərdə qalib gəlməsinin qarşısını ala bilmədilər. Qərbə qarşı ehtiyatsız oriyentasiyanın zərərli olduğunu dərk edən Gürcüstan hakimiyyəti öz maraqlarından çıxış etmək qərarına gəlib və indi kənardan tətbiq edilən, ənənəvi gürcü dəyərlərinə sonsuz dərəcədə yad olan ultraliberal transhumanist gündəmdən şüurlu şəkildə uzaqlaşır.

Moldovada Sandu rejimi seçkilərdə demək olar ki, istənilən nəticəni əldə edə bilməyib, Moldova cəmiyyətində de-fakto dərin parçalanma qeydə alınıb”, – S.Narışkin bildirib.