Bayram günlərində Bakıda təmir ediləcək yolların siyahısı - Baku TV

Bakıda keçiriləcək Ümumdünya Şəhərsalma Forumunun 13-cü sessiyası ilə əlaqədar yol infrastrukturunun təkmilləşdirilməsi məqsədilə martın 23-ü səhər saat 8-dən martın 30-u saat 22-yə qədər paytaxtda cari təmir işləri həyata keçiriləcək.

Bu barədə Avtomobil Yolları Dövlət Agentliyi məlumat yayıb.

Qeyd olunan işlərin bayram günlərində nəqliyyat axınının nisbətən azalması nəzərə alınaraq həyata keçirilməsi planlaşdırılır. Təmirlə əlaqədar hərəkət dayandırılmayacaq, məhdudiyyətlər yalnız təmir işləri aparılan zolaqlar üzrə tətbiq ediləcək.

Agentlik təmir işlərini ümumilikdə 42 ünvanda aparacaq. Təmir olunacaq küçələrin ümumi sahəsi 151 849 kvadratmetr təşkil edir.

Sürücülərdən aparılan işlərə anlayışla yanaşmaları, təmir ərazilərində hərəkətdə olarkən diqqətli olmaları, yol hərəkəti qaydalarına və ərazilərdə quraşdırılacaq müvəqqəti yol nişanlarının tələblərinə riayət etmələri xahiş olunur.