Lənkəranda WUF13 Festivalı keçirilib - Baku TV

Mayın 2-də ölkə ictimaiyyətinin Ümumdünya Şəhərsalma Forumunun 13-cü sessiyası haqqında məlumatlandırılması məqsədilə Lənkəran şəhərində WUF13 Festivalına start verilib.

Günün birinci yarısında Lənkəran Dövlət Universitetində WUF13 ilə bağlı məlumatlandırma sessiyası təşkil olunub.

Tədbirdə universitetin və onun nəzdindəki Sosial və Aqrar Texnoloji Kollecin müəllim və tələbə heyəti, eləcə də digər qonaqlar iştirak ediblər.

Çıxışlarda WUF13-ün ölkəmiz üçün əhəmiyyəti və onun çərçivəsində müzakirə olunacaq əsas mövzular diqqətə çatdırılıb. O cümlədən Böyük İpək Yolunun üzərində yerləşən Lənkəran şəhərinin tarixi və mədəni irsini qorumaqla yanaşı, müasir tikililərlə harmonik şəkildə vəhdət təşkil etdiyi qeyd olunub.

Qeyd edək ki, Lənkəranda keçirilən WUF13 Festivalının ikinci hissəsi axşam saatlarında açıq havada Heydər Əliyev adına Xatirə Parkında ictimai proqramlarla davam edib.

Axşam proqramları çərçivəsində interaktiv fəaliyyətlər, maarifləndirici oyunlar, təqdimatlar və ictimai müzakirələr vasitəsilə dayanıqlı şəhər inkişafı, inklüziv şəhər mühiti, innovativ şəhər həlləri və gələcəyin şəhərləri kimi mövzular geniş auditoriyaya çatdırılıb. Eyni zamanda WUF13-ün əsas mövzusu və ideyaları barədə ətraflı məlumat təqdim olunub.