Muğanlı-İsmayıllı-Qəbələ avtomobil yolundakı son vəziyyət | İşlər nə vaxt bitəcək?

Muğanlı-İsmayıllı-Qəbələ avtomobil yolunda aparılan tikinti işləri sürətlə davam edir.

Baku TV-nin əməkdaşı ərazidə olub və görülən işlərlə bağlı məlumat verib.

Bildirilir ki, artıq yolun 70 faizi hazırdır. Magistral ikinci texniki dərəcəyə uyğun inşa olunur və ümumi uzunluğu 85,6 kilometrdir.

Ərazidə eyni zamanda uzunluğu 885 metr olan tunelin tikintisi həyata keçirilir. Hazırda tunelin 400 metrdən çox hissəsi qazılaraq açılıb.

Azərbaycan Avtomobil Yolları Dövlət Agentliyinin (AAYDA) şöbə rəisi Asim Məmmədli bildirib ki, Ağsuçay vadisində uzunluğu 1186 metr olan unikal avtomobil körpüsünün tikintisi də davam etdirilir.

Tikinti işlərinin bu ilin sonuna qədər başa çatdırılması nəzərdə tutulur. Körpü və tunelin isə gələn il istifadəyə verilməsi planlaşdırılır.