Rubiodan Hörmüz boğazı barədə açıqlama | Ya İranın icazəsi, ya da beynəlxalq koalisiya…

Prezident Donald Tramp həmişə diplomatiyaya üstünlük verib və ABŞ ilə İran arasında vasitəçilər vasitəsilə aparılan danışıqlar davam edir.

Bunu ABŞ Dövlət katibi Marko Rubio açıqlamasında deyib.

İranı nüvə proqramına son qoymaq və dron və raket istehsalını dayandırmaq üçün konkret addımlar atmağa çağıran Rubio bildirib ki, İran qonşularını təhdid edən silah istehsalını və terrorizmə dəstəyini dayandırmalıdır.

“İranın buraxdığı qısamənzilli raketlər yalnız bir məqsədə xidmət edir: Səudiyyə Ərəbistanı, Birləşmiş Ərəb Əmirlikləri, Qətər, Küveyt və Bəhreynə zərbə endirmək", – Dövlət katibi vurğulayıb.

Rubio həmçinin ABŞ-nin İrandakı əməliyyatı başa çatdıqdan sonra Hörmüz boğazının yenidən açılacağını bildirib:

"Hörmüz boğazı bu və ya digər şəkildə yenidən açılacaq. Hörmüz boğazı ya İranın icazəsi ilə, ya da ABŞ-nin də daxil olduğu beynəlxalq koalisiya vasitəsilə yenidən açılacaq".

Rubio onu da əlavə edib ki, İran münaqişədən sonra Hörmüz boğazını bağlayacağı təqdirdə ağır nəticələrlə üzləşəcək.