Azərbaycan əhalisi arasında sorğu keçirildi: xalqımızdan sülhə reaksiya

Sosial Tədqiqatlar Mərkəzi Azərbaycan və Ermənistan arasında sülh razılaşması istiqamətində müsbət dinamikanı nəzərə alaraq bu məsələyə ictimai münasibəti öyrənmək məqsədilə əhali arasında sorğu keçirib.

Respondentlərə ünvanlanan “Azərbaycan və Ermənistan arasında sülh müqaviləsinin imzalanmasını dəstəkləyirsinizmi?” sualına cəmiyyətdə yüksək dəstək ifadə edilib.

Belə ki, sorğu iştirakçılarının əksəriyyəti, yəni 80,9%-i Azərbaycan və Ermənistan arasında sülh müqaviləsinin imzalanmasını dəstəkləyib, 18,3%-i isə əks mövqedən çıxış edib. Respondentlərin 0,8%-i isə bu suala rəy bildirməkdə çətinlik çəkib.

Sorğu nəticələrinin müxtəlif demoqrafik göstəricilər üzrə təhlilində də maraqlı məqamlar müəyyən edilib. Nəticələrin gender aspektdən təhlilinə əsasən, kişilərin 85,1%-i və qadınların 76,7%-i Azərbaycan və Ermənistan arasında sülh müqaviləsinin imzalanmasını dəstəkləyiblər. Həmçinin təhsil və yaş səviyyələri artdıqca sülh müqaviləsinin imzalanmasını dəstəkləyənlərin sayı da artıb.