Ərəblər Azərbaycan xalqından üzr istədilər

Bakıda Şəhidlər xiyabanında qeyri-etik videolar çəkərək həmin videogörüntünü sosial şəbəkələrdə paylaşan Səudiyyə Ərəbistanının üç vətəndaşının cinayət işi üzrə növbəti məhkəmə prosesi keçirilib.

Səbail Rayon Məhkəməsində hakim Azər Tağıyevin sədrliyi ilə keçirilən prosesdə təqsirləndirilən əcnəbilərə hüquq və vəzifələri izah olunub.

Daha sonra onların Azərbaycan xalqına, eləcə də şəhid ailələri və qazilərə etdiyi müraciət məhkəmədə səsləndirilib. Hər üç şəxs müraciətində bildirib ki, onlar olduqları yerin mahiyyətini dərk etmədiklərindən bu hərəkətə yol veriblər.

"Azərbaycan bizim üçün dost və doğma ölkədir. Həmin yerin Azərbaycan xalqı üçün müqəddəs olduğunu bilməmişik. Buna görə də Azərbaycan xalqından, şəhid ailələrindən və qazilərdən üzr istəyirik", – deyə müraciətdə bildirilib.

Proses dövlət itthamçısının ittiham aktını elan etməsi ilə davam edib. İttihama görə, sözügedən şəxslər bu ilin avqustun 16-da Şəhidlər xiyabanına gələrək bir neçə şəhidin məzarı üzərində qeyri-etik hərəkətlər ediblər. Onlar ittiham üzrə özlərini təqsirli hesab etməyiblər. Növbəti proses dekabrın 4-nə təyin edilib.

Faktla bağlı Cinayət Məcəlləsinin 245-ci (qəbir üzərində təhqiredici hərəkət) maddəsi ilə cinayət işi başlanılıb. Polis əməkdaşlarının gördüyü tədbirlərlə hər üç şəxs saxlanılaraq istintaqa cəlb edilib.