Ermənilərin vətəndaşlarımızı qətlə yetirdiyi Ballıqaya faciəsindən 32 il ötür

Ermənistan silahlı qüvvələri tərəfindən dinc azərbaycanlılara qarşı törədilmiş Ballıqaya qətliamından 32 il ötür.

Faciə 1992-ci ilin avqustun 28-də Goranboyun Ballıqaya kəndində baş verib.

Belə ki, Laçın işğal olunandan sonra öz evlərindən didərgin düşən yerli əhali Azərbaycanın müxtəlif bölgələrində məskunlaşmağa məcbur olub. Yaxın qohumluq münasibətləri olan 6 ailə isə heyvandarlıq üçün əlverişli olan Ballıqaya ərazisinə yerləşib.

Avqust ayında Ballıqaya kəndində çadırda məskunlaşan Laçın rayon sakinləri də buraya sırf heyvandarlıq məşğuliyyətini davam etdirmək məqsədi ilə gəliblər. Lakin avqustun 28-də Ermənistan ordusunun 10-12 nəfərdən ibarət diversiya dəstəsi əliyalın günahsız insanlara hücum edib.

Nəticədə aralarında 6 uşaq, o cümlədən 6 aylıq körpə və 93 yaşlı ahıl qadın da olmaqla, 24 nəfər amansızlıqla qətlə yetirilib. Onların bəzilərinin meyitləri yandırılıb. Qətliam nəticəsində 3 azyaşlı uşaq hər iki valideynini itirib.

Ermənilərin azərbaycanlılara qarşı törətdiyi bütün qətliamların qisası 2020-ci ilin sentyabrın 27-dən başlayaraq Azərbaycan Ordusunun həyata keçirdiyi əks-hücum əməliyyatları zamanı bir-bir alınıb.