Faciə nəticəsində 24 soydaşımız amansızlıqla qətlə yetirilib

Erməni terrorçu-quldur birləşmələrinin törətdiyi, tarixə qanlı və amansız cinayət kimi düşən Ballıqaya qətliamının ildönümüdür.

Ermənistan Silahlı Qüvvələrinin dinc azərbaycanlılara qarşı törətdiyi qətliamdan 31 il ötür.

Tarixdə Ballıqaya qətliamı kimi yad edilən faciə 1992-ci ilin avqustun 28-də, səhər saat 05:00 radələrində Goranboy rayonunun Ballıqaya kəndində baş verib.

Qətliam nəticəsində aralarında 6 uşaq, o cümlədən 6 aylıq körpə və 93 yaşlı ahıl qadın da olmaqla, 24 azərbaycanlı mülki şəxs amansızlıqla qətlə yetirilib. Əksəriyyəti uşaqlar, qadınlar və qocalar olan qətlə yetirilən şəxslərin bəzilərinin meyitləri yandırılıb. Qətliam nəticəsində 3 azyaşlı uşaq hər iki valideynini itirib.

Ballıqaya qətliamı Ermənistan Silahlı Qüvvələrinin bundan əvvəl Xocavəndin Qaradağlı kəndində, Xocalı şəhərində, Kəlbəcərin Ağdaban kəndində Qarabağın azərbaycanlı əhalisini kompakt məhv etmək məqsədilə törətdiyi silsilə kütləvi qırğın aktlarından biridir.

Ermənilərin azərbaycanlılara qarşı törətdiyi bu qətliamların qisası 2020-ci ilin sentyabrın 27-dən başlayaraq Azərbaycan Ordusunun həyata keçirdiyi əks-hücum əməliyyatları zamanı bir-bir alınıb.

Əldə olunan Zəfərə, qazanılan qələbəyə baxmayaraq, Azərbaycan xalqı ermənilərin törətdiyi kütləvi qətliamları heç bir zaman unutmayıb. Ermənistan isə hüquqi müstəvidə törətdiyi cinayətlərə görə mütləq cavab verəcək.