"İnsan nəyə toxunsa, fəlakət başlayır" | Dində məcburiyyət yoxdursa, münaqişə niyə bitmir? - AMİN

“Amin” verilişinin yeni buraxılışında ilahiyyatçı Ağa Hacıbəyli və katolik kilsəsinin mətbuat katibi Toral Ağayevlə ruhaniyyət mövzusu müzakirə edilib.

Toral Ağayev dinin insan həyatındakı rolundan söz açıb.

O bildirib ki, din insanla Yaradan arasındakı münasibətlərin bərpasını ifadə edir:

“Bəşəriyyət tarixinin müəyyən mərhələsində bu münasibətlər pozulub və insan Yaradandan uzaqlaşıb. Daha sonra isə o bu əlaqəni yenidən qurmağa çalışıb. Dini inkar edənlər belə sonradan həyatlarına anlam verən dəyərlərin axtarışına çıxırlar. Çünki iman insanın fitrətində var”.

İlahiyyatçı Ağa Hacıbəyli isə fərdin öz mənliyindən uzaqlaşaraq dəyişmək istəməsini tənqid edib:

“İnsan dəyişməyə çox meyillidir. Lakin bu zaman o, mahiyyətini itirir və oyuncağa çevrilir. Əsas olan insanın özünə dönməsidir. O, nə qədər cəhd etsə də, kainatın sisteminə təsir edə bilməz. Çünki Allahın dəyişməz dəyərlərinə müdaxilə etmək mümkün deyil”.