"Qurum qarantiya verir ki, övladım ölməyəcək?!" - Xəstə qızın pensiyası niyə dayandırıldı? - Baku TV

Baku TV-nin qaynar xəttinə müraciət edən Axirə Zamanovanın sözlərinə görə, təkbaşına böyütdüyü və kəskin qan xəstəliyindən əziyyət çəkən övladlarına erkən yaşlarda dövlət tərəfindən ömürlük pensiya təyin olunub. Lakin iki ay əvvəl qızlarından birinin pensiyası kəsilib.

Şikayətçi pensiyanın bərpa olunması üçün aidiyyəti qurumlara müraciət etsə də, hələ ki heç bir nəticə əldə edə bilməyib.

“Böyük qızım Arzu Zamanlının pensiyasını yeniləmək üçün yenidən baxış keçirilməsinə dair ərizə verdik. Bundan sonra qızımın pensiyasını kəsdilər. Aidiyyəti qurumlara dəfələrlə müraciət etmişik, canlı müayinədə olmuşuq, lakin müsbət rəy vermirlər. Qızlarım implantla yaşayırlar. Hər iki övladımın implantını ildə bir dəfə öz vəsaitimlə dəyişirəm və buna hər il 3 000 manat xərcim çıxır. Onlar kəskin qanaxmadan əziyyət çəkirlər və mütəmadi müalicə alırlar. “İmplantı çıxarın, uşağın vəziyyəti ağırlaşsın, onda pensiya düşəcək” deyirlər. Bu implantı çıxarsam, uşağımın qanaxmadan ölməyəcəyinə hansı qurum zəmanət verir?!”, – deyə A.Zamanova bildirib.

Məsələ ilə bağlı Dövlət Tibbi-Sosial Ekspertiza və Reabilitasiya Agentliyindən bildirilib ki, Bakı şəhər sakini, 2008-ci il təvəllüdlü Arzu Əziz qızı Zamanlının əlilliyinin qiymətləndirilməsi məqsədilə tibb müəssisəsi tərəfindən rəsmiləşdirilmiş “Forma 88” göndərişi əsasında vətəndaş 08.06.2026 və 14.08.2026-cı il tarixlərində əyani müayinəyə dəvət olunub:

“Hər iki müayinə zamanı vətəndaşın hazırkı sağlamlıq vəziyyətinin əlillik təyinatına əsas vermədiyi müəyyən edilib. Bu səbəbdən qanunvericiliyə uyğun olaraq diaqnozun əlillik əlaməti təyin etmədiyinə dair qərar qəbul olunub və bu barədə vətəndaşa müvafiq izahat verilib”.