İsrail daha bir rəhbəri zərərsizləşdirdi | Müdafiə Nazirliyindən bəyanat

İsrail Ordusu Qəzza zolağında "İslam Cihadı" qruplaşmasının dəniz qüvvələrinin rəhbəri Ənəs Muradı zərərsizləşdirib.

Bu barədə İsrail Ordusunun mətbuat xidməti məlumat yayıb. Bildirilib ki, zərbələr kəşfiyyat məlumatlarına əsasən endirilib.

Bundan başqa, Qəzza zolağında havadan endirilən zərbələr nəticəsində "İslam Cihadı" qruplaşmasının daha bir üzvü öldürülüb. Onun 7 oktyabr 2023-cü il tarixindəki hücumda, həmçinin İsrail ərazisinin raketlərlə atəşə tutulmasında iştirak etdiyi bildirilir.

Bu arada İsrailin müdafiə naziri Yoav Qalant ölkəsinin Livana hücum etməyə hazır olduğunu bəyan edib:

“Biz şimal bölgəsində məhdud sayda müharibə aparırıq. Məhdud sayda nə deməkdir? Biz İsrail Ordusunun gücünün kiçik bir hissəsindən istifadə edirik. Lakin düşmənin hərəkətinə görə hər şey bir saniyədə dəyişə bilər. Cavabımız sürətli, təəccüblü və çox kəskin olacaq. Bunu yadda saxlamaq lazımdır. Ancaq biz bütün məsələlər barəsində vəziyyəti normallaşdırmaq üçün qarşı tərəflə danışıqlar aparmağa hər zaman hazırıq”.

Y.Qalant həmçinin "Hizbullah"ı BMT qətnaməsinin tələbinə uyğun olaraq Litani çayının kənarında yerləşən sərhəd xəttindən çəkilməyə çağırıb.